..... حكاية

ليوما سمعت برشا كلام
برشا كلام جديد لا فهمتو و لا حبيت نفهموا...
قالولي RPG

و قالولي شعامبي ..

قالولي حملات تكفيرية و أجندات خفية..

آي برشا كلام و أنا اللي عمري بعيدا على هل البلا.. من نهارت اللي وعيت تعلمت نخلي أهل البلا في البلا و أحنا شي همنا .. و شمدخلنا!!!

هوما يلعبوا مع بعضهم على جرد كرسي في قصر و أحنا اللي بيعوا و يشريوا فينا على جالو.
اي نعم تعلمت نخلي أهل البلا في البلا خاتر ما عناش وقت للعب الكراسي..

لازمني نجري على لقمة صغاري .. لارمني نكمل نبني سقف داري قبل الشتا.. لازمني نقيم ولدي باش يدب للمدرسة 5 تاع صباح .. لازمني و لازمني .. هكا تعلمت هكا حياتي..

أما ليوما جاووني فرحانين حبوا فهموني.. أما شكون اللي دلهم على طريقي.. شكون اللي قلهم فهموني...

قالولي مبروك ولدك شهيد!!!